‘t Prille begin.     (dialect)

Toen as wij begunn met de vliegopleidege in februari 1988, waarn wij met zien viern, allemoale rond de twinteg,  ruw van moejers rokkn weg erukt. De opleiding gebeurde in Newport News, Virginia.  Wij addn nog nooit de wasse edoan, of ekookt, of ’n emd estreekn. En dan muu’j ’t zo in ien keer allemoale zellef doen. Wij woondn in ’n rijgiesuus van spaen en gipsplaete, met an de buutnkaante gele plestik noamaekplaankn. Zo wörd ongeveer ellek uus in de VS ebouwd. Vandoar dat as d’r ’n orkaan overen get, ’t veur de dag kump in de vörm van luciferties. Ien uusgenoot gooide ien keer wat wasse in de mesiene, en bij gebrek an waspoeier deu ij maer ofwasmiddel d’r in, en

um zeker te weenn dat ’t skone zol wörn, speut ij mer gelieke  d’iele flesse d’r  in. Vervolgns ging ie noar de vliegskoele, en toen ’n aandere uusgenoot twie uur laeter tuus kwam ,lag d’r en dekke loage broes en skuum deur ’t iele uus verspreid, tot an de veurdeure. Zo kriege wij ook weer ies skoon tapijt, was laeter de reactie van disse geniale uusolder.
Kookn deedn wij ’t liefste ook niet, en van ons weinige zakgeld ging vuule noar ’n snelle ap van de Burgerking of zo. D’r was in die stad ook net ’n nij restaurant lös egoan, en umme klaantn te trekkn addn ze tussn vieve en zeuvm uur ’n happyhour buffet. Dan aaj ’n pilsien veur ‘d alleve pries en wat te knaegn van ’n buffet. Miestal waarn dat ’n per stronkn broccoli met zoere dipsaus, wat tortillachips en zwieteruge keeze, mer ier was dat wel wat luxer. Champignons met krabbevleis, biefstuk in  ketjap, en dat allemoale veur nop. Dan ginge wij doar zittn, met ien pilsien, wij addn gien naegel um an de konte te kraabn, en as wij kloar waarn met dat buffet, dan was ‘t net of d’r ’n zwerm sprinkaenn overen ewest was. Kompleet eplunderd. En dan wördn wij ook geacht ’n fooi achter te loatn. ‘t Muut niet gekker wörn. Aaj zo’n tente binn’ kwaamn dan mos ie al wacht op ’n toafel, tewiel d’r gien ont in d’iele uutspännege te vienn was. Zie addn ook ’n snäckien dat iette buffalowings, dat waarn kiepevleugelties. Doar snaptn wij ook neks van, ie zolln toch zweern dat ’n buffel met zulleke vleugelties gien skien van kaans ad.
Noast deze tente zat ’n oeramerikaans hamburgerrestaurant. Aa’j dan bij de ostess die oen toafel anwees zeenn dat d’r iene joareg was, dan kwam ’t iele personeel um oen toafel enstoan, en zungn ze uut volle börst, ‘Happy birthday to you’, en ‘He’s a jolly good fellow’. Dat deunn wij ook met onze Nederlaanse instructeur as ie ’n paer pilsies op ad. En dan skroewde ij, ’ mer ek bin ielemoale niet joareg’, tewiel ze ‘m de balonn in d’aandn druktn. Mer zie zungn gewoon deur, want ja, middn in ’n versien stoppn doe’j ook niet. En dan ’n weeke laeter adde wij ‘m gewoon weer tuk. Lachn, giern en brulln, Kees protesteern met ’n dekke tonge, mer ’t mocht allemoale niet baetn. Aaj dan laeter weer ’n vliegles van ‘m kreeng dan mos ie ’t wel ontgeldn in dat krappe vliegtuugien. Dan zette ij oen ’n kappe veur d’oogn zodat aaj allient mer op de instrumentn konn navigeern, en niet noar buutn mochn kiekn.Dan mos ie d’oogn dechte doen , en dan ging d’iele kerremse van stärt, linker steile bocht, achterover, recht noar beneedn, gas d’r op en as ’n raket noar boovn, en dan gaf ie mij de knuppel en zee ie, ‘nou meneer, kijk naar buiten en leg ‘m maar recht’. ‘t Iele idee was  taa’j dan noa ofloop zo ziek as ’n katte waarn ,en gruun en geel uut dat pruttelbäkkien ruuldn.
Wij addn uut de lokale kraante veur 800 dollar ’n owto ekocht met zien viern, dat was ’n beige Chevrolet Caprice Estate, met van die noamaek öltn paneeln an de ziedkaante. In Nederland wörde deze owto in ´t zwert altied veur begraffenissn gebruukt. In de staat Virginia woar as wij woondn, betaelde ie zestig dollar weengbelastege per joar, en doar kreeg ie dan ´n nummerplaete veur. Aa’j d´r nog tien dollar bij laptn, ko´j d´r  een woord van maximaal zes letters op zettn. Wij zaagn ´n keer ´n keerl in ´n rooie Corvette sportwaegn en die ad  ´no wife´ (gien vrouwe)  op zien nummerplaete loatn zettn. Zieleg ein? Mer wij em dus ´n oamt zittn peinzn over oe wij onze kärre mossn nuumn. Dat bakbiest ad ´n acht cilinder, vuuf en alleve liter motor, en toen betaeld´ ie ien dollar veur ien gallon - vier liter bezine. Aaj ´t gas diepe intraptn, dan vleugn de keien over ´t dak van oen uus en. Mer umme eem´ op zien naeme terugge te koomn, wij em ´m ´Asobak` edeupt. Ek eb d´r nog foto´s van.