De koarte met Niet storen  d’r op kon ek niet viendn, en dus wörde ek grif estoort noa twie uur sloap in mien otelbaede in Nairobi, deur ’n vriendeleke zwaerte meneer van het hotel die vreug of ek ´n enquete in wilde vulln. Best meneer, goa ek doen, maer now eevn niet. Sloapdronkn keek ek op de klokke, allefneegn in de oamt, nog aanderallef uur en de wekker get  en dan nog ies ´n uur laeter en wi’j zittn in de bus noar ´t vliegveld van Nairobi. Eempies de BBC an ezet, doar was et onderwerp dat de veenbraand van revolutie in Noord Afrika was over eslaegn noar Lybië.

De despoot Khaddafi was bezeg zien eign vollek de dood in te jaegn. Ongeleufeleke proleet, die et land dom en aerrem ef euln, leegezeugn en zien eign clan beveurdielde bij zo´n bietien alles wat aa’j kunn bedinkn.  Ja, en zulleke veurrechtn raekn ze dan niet greeg kwiet, dus dan maer met grof geschut et grauw um ziepe ellepn. De opium van et vollek, Islam, is iets wat ie niet kunn’eetn, en dat begint ‘m op te breekn.

Volgns de BBC was et luchtruum ook esleutn, en dat was now net woar wi´j vaeke deur en muun, umme te laandn in Benghazi veur extra brandstof veur de leste ruk noar uus. Dit keer gingn wi´j rechtstreeks zonder tussnstop umdat wi´j minder vracht an boord addn. En mossn wi´j dus ´n oostelijker roete vliegn um Lybie en, over Egypte.

Vliegnd in et donker soms over of parallel an de Nijl over Khartoum in Soedan richting Egypte is et ´n serene nacht. Onwerkelijk dat in deze laandn meinsn muun knokkn en vermoord wördn um ´n rechtn te verwerrvn die wi´j as vanzelfspreeknd en normaal zien. De tirannie willn verdrievn die eur erte deurwond. Iemand in zo´n stad get s´mörns de stroate op, en is ´s oams begraevn. Regimes die meinsn stienegen, op-angn, onteufdn, ledemoatn ofakkn, ongeëvenaard in eur stuitnde barbarij.

Et is ook onwerkelijk dat ie in ´n vliegtuug kunn zittn en in die luttele uurn kan de weerld veurgoed veraandern, störtn beurzn in, wörrn wollknkrabbers umme evleugn, en dictators uut et zaedel ewipt, koom ie erns deur de lucht an vliegn en zo iniens bi´j persona non grata. Is ´n land ´n gevangenis ewörn, ofesleutn van alles, grenzn dechte, internet d´r uut, gsm netwerrek plat, pers opesleutn, oorlog.

De route get verder over El Daba net ten oostn van El Alamein, an de noordkust van Egypte, en dan over Kreta, Milos en Yannina, langes Tirana in Albanië. Boovn de Adriatische zee is noar et westn in et donker iel vaag lecht te zien an de kust van Italië. Nog zo´n aerrem land wat failliet is en bestuurd  deur ´n corrupte pornomafioso van in de zeumteg die zien oar verreft, zien bakkes strak löt trekkn deur plastiese chirurgie en ´n  arem ef van maegies van zeumtiene. Et muut toch steekn as oen eign land ´n karikatuur is ewörn, de nar van de weerld.

Maer al noar gelang wi´j vördern, vördert ook de beschaving. Et is wel ofankelek van welleke roete aa’j ´t leste stuk vliegn, dit keer kome wi´j Nederlaand binn´ over Duuslaand, maer soms ook over België, en niet dat ze doar niet beskaafd bin,(zie maekn machteg lekker bier) maer et ef toch wel vuule weg van ´n benanerepubliek. Die aerreme Bellegn, gien regering, ´n koningsuus met bastaardn en troonpretendentn die niet willn deugn of te dom bin um veur de duvel te daansn, (temeinste, zo wörd et mi’j allemoale verteld deur mien Belgische collega´s), niet maagn owtoriedn en vanuut de tuin van et paleis met eur elikoptertien rundties umme ’t paleis vliegn, as of ze an ’n elastiekien zittn.

Ek zaege et oe, en ek eb ´t al vaeker ezaegd, ´n meinse kreg ´t niet vuule beter dan in ons eign kneuterege, brave Nederlaendtien woar ´n politicus efileerd wörd umdat ie perongeluk ´n zunnebrille van onderd euro declareerd bi´j de belastingbetaeler. Et iene land ef an ’t roer ´n itsege olde bok met ´t libido van ´n kenien, en wi´j em ´n premier die vollegns mi´j nog an zien moejer mut vroagn of ie wel saemn met ´n maegien mag oppassn bi´j buurn verderop in de stroate. Wat eb ie liever? Ek wiete et wel. Dan kan zo´n getapte cabaretier wel zaegn; ’ Je bent ’n burgerlul’ , now, dat is dan maer zo. Doarumme willn al die sloebers uut die jurreknlaandn ier allemoale noar toe, um dat gezapege leevntien woar die o zo grappege man met zien uilebrillechien op et podium altied zo greeg overen mag urineern. Veur die meinsn muut ons gezapege leevn d’r uutzien as et Walhalla, emel op aarde. Oe spaenn’d wil ie ’t em? Soms muu’j gewoon oen  knoopn telln…