In Libris Est Verum

Ie zolln oaste goan dinkn dat ek ook al Latijn spreke, maer neks is minder woar. Ek vond et gewoon een intelligent klinknde titel veur et leste verael van 2012. De woar-eid is in de boekn. Op de site van GenemuidenActueel stond onlangs al ’n stuk van Erik Driessen over schrijver dezes, dat is mooi, want de PR mesiene muut netuurlek op volle toern draein aa’j ’n boek uutbrengn. Bi’j deze Erik, en ook Willem Timmerman, bedankt veur et platform! Tewiel as ek dit skrieve vliege wi’j over Portland, Maine, ’n mooie stad woar ek ’n klein joar ewoond eb. Old Orchard Beach gled onder ons deur, doar zat ek de winter in ’n leegstoand otel, wat gien

gastn ontvong in ’t laagseizoen. Toen kon ek nog niet bevroedn dat ek ’n boek zol uutbrengn. Et lek ’n ieuweg’eid eleedn. Vrijdag de 14e december eb ek et eerste gedrukte exemplaar van Kerosine overandigt an mien olde boas Martin Schroder. Dat vond ekke, maer i’j ook, ’n mooi moment. I’j zee nog; ‘ Al ad d’r ’n alleve meter snei eleegn, ek ware ekoomn.’ Kiek, doar ol’ ek van! Et feit dat ie ’n mooie Range Rover ef maekt zo’n bewering ook weer wat makkeleker te maekn netuurlek.  Vrogger was Martin ’n kei-erde, niemand ontziende boas umme veur te werrekn, maer now ie met pensioen is, is ie op zien ien’ntachtegste wat meer ‘mellow’  ewörn. Miskien volgnd joar al get ie as eerste klaante van het X1 Curacao Spaceproject de ruumte in. Zie addn ‘m medisch streng ekeurd en ‘m ook nog in ’n G krachtn centrifuge ezet woar ie probleemloos 6 G trök. I’j dut maer, i’j gef op zien olde dag gien krimp. Ek eb altied vule respect veur die man ad. Drie joar geleedn stopte ek met skrievn veur Op de Bok, et blad van de Vereniging van Nederlandse Verkeersvliegers, de pilootnvakbond. De grabbeltonne met veraeln was leeg noa acht joar. Doarnoa skreev-ek, en dat doe ‘k nog steeds, zo now en dan wat veur Luchtvaartnieuws, en al die tied bleevn vriendn en collega’s mi’j anspoorn de veraeln te bundeln en uut te geevn. Toen ek dus et boek van Erik Driessen zag - Dit land vraagt om een boot – maekte ek contact met ‘m en kwam zo achter de gang van zaekn met de uutgever Free Musketeers. Dus mos ek an de gaank umme alle veraeln zovule meugelek vrij van jargon te maekn, zodat iederiene ze goed kan leezn, ook al zol ie nog niet et verskil wietn tussn ’n luchtballonne en ’n elicopter. Dat is elukt, getuge mien skoonmoeier die et probleemloos uutlas, en d’r ook enthousiast over was. Ek wol et kloar em veur de Kerst, want in januari ef iederiene de boek dekke en de portemonnee dunne, en dink ie eempies niet meer an koopn. Met in et achtereufd et idee dat et ook ’n leuk kado is umme te geevn zo met de feestdaegn. En dat is ook elukt, ’t was anpootn, maer Kerosine is ’n feit. Mien vrouwe ef al de taelfoutn d’r uutezeeft. De naeme eb ek ekeuzn umdat ie kort en bondeg is, en d’iele luchtvaartweerld d’r op draeit. Gien kerosine, gien veraeln, gien Kerosine. De umslagfoto eb ek zellef eneumn met ’n smartphone vanuut de cockpit ergns boovn de oceaan. Soort van ’n bietien abstract, maer et oademt wel veur mi’j die mooie vrij-eid van ’n voegel in de blauwe lucht. Doar woar ek altied weenn wol, an ’t roer van zo’n grote zilvern voegel. De veraeln in ’t boek vertelln de rest. Ek bin ’n daankber meinsne die de skrieversgeenn van mien vaejer erft ef, iets wat toch via de Boozn kaante löp in onze femilie. Ons wörd eleerd dat wi’j muun woekern met onze talentn, ek eb mi’j weer ’n stukkien verder ontplooit, en doar bin ek wel wies mee al zaeg ek et zellef. Maer, ek lope et risico dat ek d’r uut goa zien as ’n pouwe as ek mi’jzellef nog meer veern in de konte steke. Dus now ol’ ek d’r over op. An alle lezers, fijne Kerstdaegn, en ’n gezond en gelukkig 2013.

Foto: Herman Mateboer (47) reikt het eerste exemplaar van zijn boek Kerosine uit aan zijn voormalig baas Martin Schröder.

Het boek Kerosine van Herman Mateboer is in de online boekwinkels te koop.