Door: Jannie Bakker
“Ek deinke dat aa’k et mær op mien spaerrekening zette…”
Et klinkt een bietien twiefelend, um niet te zaegen: wan-opig, uut de mond van de prieswinnaar. Dat viendt verslaggever, deink ek, ook. Nog gien tien seconden eleden ef ie de jonge vertöllen dat zien antwoord goed was en dat ie dus een paer onderd euro ewunnen ef, en metiene wil ie wieten woor as dat an besteed get wörden. “Op oe spaerrekening? Goa’j d’r gien brommer veur kopen? Of bi-j nog gien zestiene?” “Jawel, ek bin zeuventiene, mær …” “O, dan ei’j zeker al een brommer. Now, ie deinken d’r nog mær ies over. Vule geluk met oen pries in ieder geval!” En metiene bærst de volgende cd lös en daevert et programma al weer deur. Ek geleuve dat aa’k net zo verboesd waar as die onbekende jonge.
Ie zullen mær in een opwellige noar een radiospullegien bellen, et goeie antwoord geven, een paer onderd euro winnen en dan metiene muten zaegen woor as dat geld an op zal goan! Die leste vroage zo’k, geleuv’ek, muuilijker vienden as et spullegien zelf, oewel aa’k door et antwoord ook niet op wus. Mær dat leg, deink’ek, meer an mien leeftied: de mieste radiospullegies bin, gezien de vroagen, veur onder de dærtig, en door kan’k met de beste wille van de wereld niet meer veur deurgoan.
Zol et antwoord op de vroage “Wat goa’j doen met dat geld?” ook makkelijker wezen aa’j onder de dærtig bin? Aa’j nog niet zo met spaerrekeningen bezig bin, zæg mær, en altied geld tekört komen? Ek wiete wel zeker dat mien kienders niet zo lange zollen oeven noa te deinken over die vroage! Stel dat aa’k tegen ze zol zaegen: “Ek eb een pries ewunnen mær ek wiete niet goed wat aa’k veur dat geld muut kopen. Ek geve oe allemoale twieonderd euro, mær ek wil derect wieten wat aa’j door mee goan doen!” Dan kreeg ek vaste wel antwoord!
Nummer iene zol, deink ek, eur man ies even ankieken, dankbaar noar mi-j lachen, een tedere blek op eur kroost wærpen en dan zaegen: “Dan kreg de krummel toch een ni-j fiesien, dit veurjoor. Of zullen wi-j d’r een skommel in de tuin veur kopen? Of een ni-j tuinset? Of…” Nee, veur nummer iene zol disse vroage gien probleem opleveren!
Nummer twie zol waarskijnlijk een vreugdekreet slaeken in de geest van: “Waauw, twieonderd euro! Dan kan’k toch ni-je zoemerkleren kopen!” Niet dat ze dat zonder zo’n meevaler niet döt, eur, allienig wet ze dat now nog niet. Sinds ze veurig joor een uus ekocht em muut ze wat zuniger an doen. Zie ef doorbi-j drastische veurnemens in de geest van: “Ek eb een kaste vol goed en kan best een seizoen oversloan met kopen.” Et eerste is woor, et twiede niet: zie zwicht ge-eid veur een gekope anbiedige of de uutverkoop, mær geleuft now dus nog eilig van niet.
Nummer drie zol waarskijnlijk even verliefd noar zien vrouwe kieken en zaegen: ‘Zullen wi-j dan toch een ni-j wiegien veur ons kleingien kopen in plaese van d’r iene te lienen?” Zien gedachten draeien momenteel mær umme ien dink, die van zien vrouwe ook en bi-j tied en wijle draeien die van mi-j door gewoon met mee.
Nummer viere zol, deink ek, zaegen: “Doet er nog onderd bi-j as et kan lieden. Mien tillevisie is neudig an vervangige toe en ek eb een leuke anbiedige ezien veur €299,-. Teletext, alles d’rop en d’ran! Lukt et nog um mörgen dat geld op mien rekening te ebben? Geeft et mi-j aanders mær contant, want mörgen e’k tied um de stad in te goan!” Die ef altied meer geld neudig as woor as ie over kan beskekken. En et muut altied derect. Typisch zo’n jonge die as an et einde van zien geld altied nog een stuk moand over ef. Chronisch platzak. Die zol wel tien menieren wieten um zo’n fooi uut te geven!
Jæmmer veur mien gæssen dat eur moeier van boven de dærtig zelf nog wel wet wat ze met eur geld wil doen. Aa’k d’r mær even over noa mag deinken. En ek eb trouwens gien pries ewunnen.
Mær toch gæk, dat aa’k met zokke kienders die vremde jonge zo goed begrepe!
Jannie Bakker – Rietman,
Dialæct van Gællemuun
