Contact formulier  |  info@genemuidenactueel.nl  |  RSS  |  Twitter  |  Mobiel  |  Red.
>>
dinsdag 14 oktober 2014
13e Jaargang... Update:
  Poorties ... »
Column van Herman Mateboer
maandag 13-08-2012
Column in het Genemuider dialect door oud plaatsgenoot

Tuus
mateboer_180Van lest onderweg kreeg ek via de telefoon ‘n foto van mien zeune Sebastian die met zien nije werp’engel ‘n kleine snoek ad evangn. Now stet ie weer op de steiger met zien spierwitte bussien oar en zien angelder, in d’ oope dat ie d’r weer iene an d’ oake kreg. De kleine meid tumelt over de trampoline en d’ oldste zit te leern veur zien leste wiskunde toets van dit skoeljoar. Mien vrouwe gef de bloemn waeter in de tuin en ek maeke mien beutien skone met ’n olde lappe. Langzaam sköf de zunne leger en noar ’t westn. De wiend get laegn en de buuzn stoppn met wiegn en stoan roerloos in

‘t waeter. Ier an ’t waeter ef iederiene riet of tuseboltn veur de wal, maer toen wi’j de sleutel kreegn van dit uus, tien joar geleedn, wol ek buuzn em as ’n soort hommage an mien ofkomst. Sinds ier gien kokospalmn willn gruujn mos ek buuzn em. De Klaas Aaln em ’t riet weg egraevn, toen ze de steigers bouwdn en Dick de Kärper ef mooie buuzn epoot. Ek muut buuzn em, dacht ek toen, en dat vien ek nog steeds. Dat eurt bi’j ‘n Booze. Aa’j met maetties groot ebracht bin dan löt oe dat niet meer lös.  De buuzn stoan volgruuid, dekke en gruun, fier in ’t waeter.
Et is de twiede oamd weer terugge op ’t onk, en met ’t tiedverskil in mien lechem kan ek toch niet sloapn, dus ek doe ook gien muujte. Iederiene is al noar baede as ek achter de piano kroepe en in de verder stille kaemer lekker zitte te pieln. Dan loop ek noar de kaste en skink’ek  mi’j zellef ’n goeie belle Bowmore in en snoeve de turfgeur uut Schotland. Buutn zak ek in de tuinstoel in de lauwe oamtlucht en steke de braand in ’n sigaartien en vule de turfbraand noar beneedn zakkn. De weldadige stilte wörd allient deurbreukn deur kekkers en ’n paer gaanzn op pad noar de Oostvaardersplassen. De moane is in zien derde kwaertier en ’t water is glad as eulie, net as ofgeloopn februari, maer now vloeibaar.
Met et eufd in de nekke kiek ek noar de onmeteleke sterrn’emel en zie ’n satelliet zien baene trekkn met wat ’n duzelingwekknde snelheid muut weenn. Gisternacht vleug ek ook deur dat donkere zwerrek. In die paer vierkaante meter vol met knöppies en aendels, met gedimde lechies van meters en beeldskerremn, oaste teegn de snel’eid van ’t geluud, beweugn wi’j toen noar ‘t oostn. Eerst zes uur Atlantische oceaan en dan et smaragdgruune Ierland, en verder over Manchester en East Anglia. Dan kump de Noordzee in zicht.
 ’t Onstuimige weer van de Nederlandse rivierdelta zörgde veur ’n elder zicht en ’t beigekleurige Noordzee straand en de duinn’ lonktn noar mi’j; ’Ie bin d’r oaste’. Links noar ‘t noordn kon ek Texel zien laegn, en noar ’t zuudn de Maasvlakte en de Zeeuwse eilaandn. Et zicht was fenomenaal. Over Durgerdam zaag ek links ’t peerd van Marken en veuruut d’Oostvaardersdijk woar ek straekkies over zol riedn, langes de wiendmeulns op weg noar uus. Over ’t tippien van de Flevopolder draeidn wi’j umme noar ’t westn, teegn de wiend in, over ’t Pampus radioboakn, noar Schiphol.
Dat was de dag d’r veur. Now get langzameraand overal ’t lecht uut in de buurte, ’n vleermuus sköt deur ’t lecht van de laampe op de steiger. In de verte eur ek geruus van owtobaandn op de klinkers van de Knardijk. De stemmn van twie maechies op de fiese die nog over stroate goan klaetern over ’t donkere waeter. De eldere witte stippe diepe in ’t eelal verdwient achter de raand van de dakgeute. Ek neme nog ’n slukkien whiskey en ’n trekkien van de sigare en kan maer ien dink bedinkn ; Lekker weer tuus.

 

 

Gepubliceerd op: maandag 13-08-2012 door Willem Timmerman. 4004 keer gelezen..

Reageren is slechts toegestaan voor geregistreerde bezoekers.

(Advertentie)

Meer columns:

Herman Mateboer:

Jannie Bakker:

Flip Visscher:

(Advertentie)

Wie is Online ?..

Nu online: 5 bezoeker(s)
LEDEN LOGIN
Inloggen





(Advertenties)

(Advertentie)

Pagina gegenereerd in 0.0325 s. | Webmaster:Redactie | disclaimer | login