Contact formulier  |  info@genemuidenactueel.nl  |  RSS  |  Twitter  |  Mobiel  |  Red.
>>
dinsdag 14 oktober 2014
13e Jaargang... Update:
  Poorties ... »
Column van Herman Mateboer
maandag 03-09-2012
Column in het Genemuider dialect door oud plaatsgenoot

Twie gezechtn

mateboer_180In opdracht van mien boas breng ek et wiekend deur in Santiago, de hoofdstad van Chili. Op 2 september wördt de tied ’n uur veuruut ezet, want de lente begint. De boomn bin kael, maer overdag is et mooi zunneg en tussn de ienntwinteg en viefntwinteg groadn. Veur wat vertier em wi’j ’n bezuuk ebracht an de wijngaard van Santa Rita, die mooie wienn maekt in olde skuurn opetrökkn uut adobe. In Nederland stoan ze veur ’n euro of vieve in verskillnde supermaerktn. Met mien collega maeke wi’j ’n flesse Carmenere Reserva en  ’n mooie biefstuk skipper, veur minder dan de taxirit. Aa’j ier um oe en kiekn dan zie’j oe dit laand de economische tijger is van dit continent. Gien laand, behalleve Brazilië dut et zo goed.

Toen aandere laandn nog zuchtn onder et wanbeleid van ’n communistische proleet of ’n kolonelsregime werrektn ze ier zich met  de militairn toe noar ’n democratie die zo goed en zo slecht as dat get, wel werrekt. In Nederland wörde in de joarn zeuvnteg en tachteg deur linkse politici et regime van Pinochet verofskuwt. Diezelfde politici ummaerremdn wel ’n linkse dictator met net zovuule of nog meer bloed an d’aandn, onze vriend Fidel. Met zien teegnstaanders uutemoord of in et gevang, leefde Fidel met ’n mooie Havana in de snufferd op zien banaann eilaand vol olde joarn vuufteg Amerikaanse kaerrn, en ’n onveraanderd menu van vaerknsvleis, boonn en rieste. Vis em ze d’r amper, want zo gauw iemand ’n beutien ef umme vis te vangn peddelt ie noar Florida, honderdvuufteg kilometer verderop. Zulks bin de zegeningn van et communisme. Maer die man wörde deur links den Haag oaste dood eknuffeld, en wi’j stuurdn zelfs onze olde bussn d’r en.
Maer de slechterik van Chili, Pinochet, nee, die kondn ze et beste maer an d’oogste boom angn. Ek eb met meinsn ier eproat, collega’s die ier werrekn en  woonn, lokale Chileenn dus.  Probeert ier gien slecht  woord over die man te zaegn, want iel vule meinsn draegn em op aandn, ook al is ie al ’n poosien dood. As i’j de revolutie niet ewunn ad, was Chili zeer woarskienlek ook ’n communistische eilstoat ewest net as Cuba. Dat beseffn ze ier iel goed. En zie wietn ook dat ’n oorlog, of ’n revolutie nooit get zonder dat beide partij’n skae oploopn. Nooit zonder bloed vergietn, en gemiene streekn, lugubere moordn, en intimidatie.  Dat em wi’j in ons softe laand uut ons collectief geheugn eproat. As et op links gebeurd, Castro, dan is ’t niet erreg, maer as ’t op rechts gebeurd bin et allemoale fascistiese boevn. En wie ef d’r geliek? Diegene die wint.
En wi’j, wi’j bin sinds de onof-ankelijkheid van Indonesië eciviliseerd toch? Onze Hagenese politici, met naeme de linksn bin zo politiek correct en vol van het eilige vuur van gerechtigheid, dat wi’j Zorreguieta met ’n uutgestreekn gezechte de toegang weigern tot zien dochter zien brullefte, want die man die was toch slecht ewest vrogger, proat mi’j d’r niet van. Niet deinkn an de barbarij van ’n koloniale overmacht in ’n Indochinese archipel, niet an deinkn, neuh… En dus em ze in Den Haag as ’n Pontius Pilatus de aandn in onskuld ewassn toen ze de kwestie van Julio Poch (Nederlands burger) kondn loozn deur em gewoon as ’n crimineel op te loatn pakkn, in Spanje. Zo, doar bin wi’j mooi vanof. Skuldeg tot et teegndiel is beweezn. Zo ontzettnd laf en achterbaks.
Nee, nee, Indonesië mag niet onze tanks koopn, want, dat bin mi’j toch ’n stel slechterikkn, met slechte meinsrechtn enzovoorts. Och, och, och, wat ’n triest relaas. Zo hypocriet as de bleksem,  gewoon met ’n uutgestreekn gezechte d’iele weerld roomser as de paus de les leezn. Ondertussn ef Indonesië zien tanks uut Duuslaand betrökkn, en kreeg joarn geleedn Taiwan zien doekbootn van de Fraansn, en niet van ons, umdat wi’j weer ies politiek correct waarn. Ondertussn gien kwaod woord over Tsar Poetin want dat is aendeg veur ’t zaekndoen. Dat kump gewoon goed uut zo, eulie, gas enzo. De Russn, man, dat bin gewoon vaerrekns in ’n meinseleke gedaante. Dit is toch gien beleid? ’t Is ’t uj ofte fuj, ek kan d’r gien sukela van maekn. Ek maeke mi’j ier vuus te kwoad umme, want et is beskaemnd, aa’j d’r as nederlaander noar kiekn. Wi’j bin de gekke Henkie van de weerld, en zo dubbel dat gien iene nog begrep met wie ze now van doen em.
Maer ja, wat get Jan met de Pet d’r an doen? As ‘t ‘m al interesseert? Neks. Et beste kan ie gewoon noar de supermaerrekt goan en ’n flesse Undurraga koopn, of Errazuriz, of Viu Manent, Santa Clara, Concha y Toro, Cousino Macul, Gato Negro, Santa Rita, Casas del Bosque, umme maer wat te nuumn. Vol van de australiese zunne, vol body, van de grond van ’n mooi laand, wat ook gewoon veuruut wil, en temeinste zonder al te vule skrupules eur geskiedenis onder oogn wil zien.

Gepubliceerd op: maandag 03-09-2012 door Willem Timmerman. 3547 keer gelezen..

Reageren is slechts toegestaan voor geregistreerde bezoekers.

(Advertentie)

Meer columns:

Herman Mateboer:

Jannie Bakker:

Flip Visscher:

(Advertentie)

Wie is Online ?..

Nu online: 5 bezoeker(s)
LEDEN LOGIN
Inloggen





(Advertenties)

(Advertentie)

Pagina gegenereerd in 0.0446 s. | Webmaster:Redactie | disclaimer | login