Contact formulier  |  info@genemuidenactueel.nl  |  RSS  |  Twitter  |  Mobiel  |  Red.
>>
dinsdag 14 oktober 2014
13e Jaargang... Update:
  Poorties ... »
Column van Herman Mateboer
donderdag 16-02-2012
Column in het Genemuider dialect door oud plaatsgenoot

Dekke deui

Et ef ‘n weke eduurt, et ies en skaesfestijn. Veureg joar stond’ek  snel op ’t ies van de Oostvaardersplassen, maer kort doarnoa ging ek veur de baas op pad, en was de pret veur mi’j over. Dit keer waar’ek d’iele weke tuus, en eb d’r maximaal van geneutn. Ier achter lag et net twie daegn dechte maer et vreur zo aerd, -24 em wi’j emeetn ier in de buurte, dat ek op zoaterdag  twie weekn geleedn op ’t ies kon stoan en de snij d’r of eskupt eb.

Veureg joar em wi’j met de bewoners ’n kleine veegmesiene an eskaft, die ef zien nut ook wel beweezn. Verder adde wi’j over de twie’onderd koters die de Elfsteigertocht eskaest em, en oaste niet op de bienn kondn stoan van de sukelamellek, kuukies, snert, of breudties knakwörst, net as eur olders die laeter etzellefde fysieke verskiensel addn, maer dat kwam meer van de glühwein.
Maer gelukkeg bin ek ook nog twie keer in de kop van Overiessel ewest, en dat blef toch altied et mooiste. Op ien dag ad ek ’n moat mee eneumn, die zellef opgruuide in Broabaant, die was laaind enthousiast. Et is ook uniek! Jaemmer dat met de Wiedntocht de pliesie van Zwaertewaeterlaand skaeserties mos pestn, deur de weg van de Sluus noar de Belt of te sluutn en te driegn met bonn’. Dus ek bin maer op estapt in de Sluus, in die neie wiek an ’t waeter. Ook aerstekke mooi eur, zo over de Aremberger gracht noar de kleine Belter. Saemn met bruur Arend en zus Geke de körte tocht eskaest, achter ’t Klooster langes, deur allerlei kraggn en smalle kronkelsleuties deur ’t riet. Maer, en doar wör ek wel naerreg van, dan i’j altied van die roedels keerls in strakke spandex paekkies, die altied aerd muun goan. Net as ie onbe-öllepn over ’n baerste in ’t ies stunteln jög oe zo’n troep keerls veurbi’j en  niet zeldn blievn ze oakn met eur skaesn, of roppn zo aerd dat ze niet meer kunn uutwiekn, en ja eur, doar get de dominotrein. Klabats teegn de weerld. As ie zo aerd willn, goat dan op die grote plassn man! Op de Beulakker eb ie alle ruumte, en as ie deur de geluidsbarrière willn, mooi, gien iene die oe teegn eult. Maer woarumme ier, op zo’n nauw sleutien achter Barsbeek, zo onbenulleg jakkern? Doarbi’j vroag ek mi’j of, et is deinsdag, die gaessn em ’n dag vri’j eneumn, geniet d’r ies van! Kiekt ies umme oe en noar al dat moois! Mien musse beveurbeeld, ek eb ’n prachtege musse, et is ’n echt kenien, buutntse binn’ ekiert, machteg mooi! Of die wiendmeulechies, of die rietboern die oogstn. Eeuwnold ambacht, woarumme jakkert ’n meinse op zien vrije dag doar langes as of de duvel ‘m op d’akkn zit? Echt woar, ek kan d’r niet bi’j!!
Maer ja, die stresskiepn zien ie gelukkeg ook niet terugge in de Waterlelie, want doar wörd nog gewoon straf deur erookt, en dat kunn de snelle jonges niet em. Maer wat missn ze wat, d’r get neks boovn zo’n dag uutwaein over de aerdbevreurn vlaktn van de Wiedn, in de verwaeide geur van verbraand riet ofval, umme dan in Cafe Geertien of de Waterlelie ’n lekker kold pilsien te drinkn, met ’n bak snert, of ’n beernburgien. Ek eb et al ies eerder ezaegd, et is Nederland op zien mooist!

Gepubliceerd op: donderdag 16-02-2012 door Willem Timmerman. 4095 keer gelezen..

Reageren is slechts toegestaan voor geregistreerde bezoekers.

(Advertentie)

Meer columns:

Herman Mateboer:

Jannie Bakker:

Flip Visscher:

(Advertentie)

Wie is Online ?..

Nu online: 5 bezoeker(s)
LEDEN LOGIN
Inloggen





(Advertenties)

(Advertentie)

Pagina gegenereerd in 0.032 s. | Webmaster:Redactie | disclaimer | login